သေတွင်း

အလွမ်းခါးခါးနဲ့
ခပ်ဖျော့ဖျော့ ပန်းရနံ့များ
နေ့စဉ်စားသုံးမိတယ်။
မရွာဘဲ စိုစွတ်စေသော ဒီမိုး..
ကြယ်ရောင်မဲ့ညများ နဲ့
သက်ဝင်မှုတို့ ပျောက်ဆုံးဆဲ။

ဒီလိုနဲ့... ဘ၀က
မျောလိုက် ပေါ်လိုက်
ခါးသောမုသားများနဲ့အတူ
အလည်လွန်နေသော
အရာများအား သတိရတိုင်းထုတ်ကြည့်ရင်း
ကိုယ့်သေတွင်းကိုယ်
အခါခါတူးမိနေတယ်။

အိပ်ပျက်ညတို့ ပျောက်ဆုံးစေရန်
ဝင်သက်ထက် ထွက်သက်ကို
ကြာရှည်စေခဲ့ရင်း
ခေါင်းတခါခါ လည်တခါခါ
လွမ်းမိတယ်။

မြတ်နိုးစွာ သည်းခြေမဲ့သော
နှုတ်ခမ်းက တိုးတိုးလေး
တိုင်တည်မိနေဆဲ...
ချစ်မိသည်မှန်သောစကားကြောင့်
သံသရာအဆက်ဆက်
မတွေ့ပါရစေနဲ့..။

ဒီလို ဒီလိုနဲ့....
လေညင်း...အေးပါစ
ရနံ့မွှေးပါစ..
နေ..သာပါစ.
စူးစမ်းချင်စိတ်နဲ့ အတူ
အရဲစွန့် မျက်လုံးဖွင့်လိုက်တယ်..
အားလုံး ကန်းသွားခဲ့ပြန်တယ်..။

ချစ်တဲ့
ရနံ့ချို

နေတတ်သလိုနေပါတော့ - လင်းလင်း

မောင်လေးတွေနဲ့ သီချင်းတွေ

ကျွန်တော့်မောင်တွေနဲ့ ဆိုဖြစ်တဲ့သီချင်းတွေအတော်များများရှိတယ်။
မှတ်မှတ်ရရ ရှိစေတဲ့ သီချင်းတွေနဲ့အကြောင်းတွေကို ခုထိမှတ်မိနေသေးတယ်။ငယ်ငယ်က နွေရာသီနေ့ခင်းတွေမှာ မောင်နှမတွေ ထမင်းစားပြီး အဖွားတို့အိမ်ရှေ့က ဘုရားစင်ရှေ့မှာ တန်းစီပြီး တစ်ရေးအိပ်ကြလေ့ရှိတယ်... ဒီလိုနေ့ခင်းတွေဆို အဆော့မက်တဲ့ မောင်တွေအဖို့ တော်တော်လေးစိတ်ညစ်ကြတယ်ထင်ပါတယ်။အဖိုးနဲ့အဖွား ပဲရှိတဲ့ ဒီအိမ်ကြီးထဲမှာ သူတို့ ကလေးတွေအဖို့ တိတ်တိတ်ဆိတ်ဆိတ်ကြီး ဘယ်နေချင်ကြမလဲ။
အဖိုးနဲ့အဖွားအိပ်ပြီိဆိုတာနဲ့ သူတို့က ကျွန်တော့်ကို ဈေးကို သွားလည်ကြဖို့ ဆွယ်ကြတော့တာပဲ။သနပ်ခါးတွေ အဖွေးသားလိမ်းပြီးသား ကျွန်တော်တို့တွေအတွက် ဈေးကို ခိုးထွက်ဖို့ နောက်ဖေးတံခါးကနေသွားနေကျပါ။လူကြီးတွေ ဘယ်လောက်ပဲ ဆူဆူ နေပူပူ ဈေးထဲသွားပြီး ဂျပိုးလုပ်ချင်ကြတာပါ။တစ်နေ့တော့ အဲ့လိုသွားဖို့ပြင်နေတုန်း အဖွားနိုးသွားတာနဲ့ ကြုံနေတော့ မသွားရတော့ဘူး။မောင်တွေထဲက မောင်လေးယုန်ကလေး က တော်တော်လေးစိတ်ညစ်သွားတယ်။၂တန်းကျောင်းသား သူကခေါင်းအုံးမှာမျက်နှာအပ်ရင်း တိုးတိုးလေးညည်းလိုက်တဲ့သီချင်းက -
"နင်ဟာအတောင်ပါတဲ့ငှက်ပါ...ငါက လွင့်ပါးတဲ့ရော်ရွက်ဝါ"တဲ့။အဲ့ဒီသီချင်းက ၅တန်းကျောင်းသူ ကျွန်တော်အတွက် ပထမဆုံး ကြားဖူးတဲ့သီချင်းလေးပါ...။အဲ့ဒီအချိန်တုန်းက ရေပန်းစားတဲ့အတိုင်း သူ့ကို အဲ့ဒီသီချင်းလေး ကို သီချင်းတွေစုရေးထားတဲ့ စာအုပ်လေးထဲ ရေးခိုင်းတော့တာပါပဲ။သူက ရေးပြီးတော့ သူ့လက်မှတ်ကို ကြယ်တွေနဲ့ အတူထိုးပါတယ်။ယုန်ကလေး တဲ့။

နောက်တစ်ပုဒ်ကတော့ မောင်လေးဖိုးတေဇာကြောင့် ရတာပါ။ သူနဲ့ကျွန်တော် နေ့ခင်းဘက် အိပ်နေတုန်း အိပ်မက်ထဲမှာ ဂျယ်လီလေးထောင့်တုံးလေးတွေက သကြားလေးတွေကပ်ထားတဲ့ ယိုယိုး ကို မှတ်မိကြတယ်ဟုတ်။ အင်း အဲ့ဒါလေးတွေက ကျွန်တော့် မျက်နှာနားမှာဝဲနေတယ် အများကြီးပဲ။လိုက်ဖမ်းတယ် မမိဘူး မိခါနီးကျ လန့်နိုးသွားတယ် အမှန်က ခြင်ထောင်က လေးတောင့်အကွက်လေးတွေက နေထိုးတော့ အရိပ်အဖြစ်နဲ့မျက်နှာပေါ်လာကျနေတာ။ ဒါနဲ့မောင်လေးကိုလှည့်ကြည့်လိုက်တော့ သူက ကတ်ဆက်ကြီးကို ခြင်ထောင်ထဲထည့်ထားပြီး သီချင်းနားထောင်နေတယ်... ကြိုက်လို့ သူနဲ့အတူ ကတ်ဆက်ကို ရပ်လိုက်၊ သီချင်းကို ရေးလိုက်နဲ့ ပျော်နေကြတာ။ကျွန်တော်ဆို ပျော်လွန်းလို့ ရင်တွေတောင်ခုန်မြန်ခဲ့တယ်။ပြီးလည်းပြီးရော ဖိုးတေဇာနဲ့ကျွန်တော်ခေါင်းချင်းဆိုင်ပြီး အတူအော်ဆိုကြတာက" သစ်ငုတ်ကိုရွှေချလို့ လှမလာတော့ မင်းလေးသာချစားလို့ အသားတွေ ပွန်းကုန်ရော့မယ်"..တဲ့ ။အဲ့ဒီသီချင်းက ကျွန်တော်တို့ကလေးတွေအတွက် ဆိုရတာ တော်တော်လေးခက်နေပါတယ်...ဒါပေမယ့် အရမ်းကြိုက်ခဲ့ကြဖူးတယ်.။ခုတော့ အဓိပ္ပါယ်သိလို့ ပိုဆိုလို့ကောင်းတယ်ထင်မိတယ်။

ကျွန်တော်မှာကျွန်တော့်ထက်၅လ ပဲ ငယ်တဲ့ မောင်တစ်ယောက်ရှိတယ်။
သူကသူ့အဖေရှမ်းသွေးပါတယ်။
ကျွန်တော်က သူ့ကို အရမ်းချစ်တယ်။
သူကကျွန်တော့်ရဲ့ ကစားဖော်ပဲလေ။သူက ရှမ်းပြည် သီပေါကို ခနတိုင်း ဖေဖေဦးနေ၀င်းနဲ့အတူ ပြန်လေ့ရှိတယ်..။သူပြန်တိုင်း ညဘက်မီးအိမ်ကနေ သက်ကယ်နံရံမှာထင်နေတဲ့ ကိုယ့်အရိပ်ကို ကိုယ်စကားတွေပြောတတ်တယ်။ မှတ်မိနေသေးတယ်။
အရိပ်ကိုကြည့်ပြီး လက်ခုတ်တီးပြီး မောင်လေးကိုဖြိုးရေ ဆိုပြီးခေါ်တတ်လွန်းလို့ လူကြီးတွေဆိုအရမ်းရယ်တယ်။
မှတ်မှတ်ရရ အဲ့ဒီနေ့ညဘက်မှာ မြင်းလှည်းကြီးနဲ့ သူတို့သားအဖပြန်လာကြတယ်။ရှမ်းဆံပင်ကေလေးနဲ့ မောင်လေးကသီချင်းဆိုပြီး ၀င်လာတယ်။ ကျွန်တော်နဲ့သူ အိမ်ရှေ့မှာပဲ ရှမ်းဓားသိမ်းက, ကကြတယ်။သူအဲ့ဒီတုန်းက သူဆိုတာက တစ်မူးရလို့တစ်ပဲလှူ ဒို့ရှမ်းတောင်သူ တုနိုင်ရိုးလား တဲ့။ မေမေယုဆိုရင် ရယ်လိုက်တာ။အခုသူက ကလေးနှစ်ယောက်အဖေဖြစ်နေပြီ။ရှမ်းပြည်ကကောင်မလေးကိုပဲ ယူတာပါ။သူ့သမီးအကြီး ဂူဂူးက ကျွန်တော့အချစ်ဆုံးပါ...ပါးအို့နီနီ နှုတ်ခမ်းနီနီလေးနဲ့ သူက သူ့အဖေဂစ်တာတီးရင် သူက သီချင်းဆိုတတ်ပါတယ်။
၃နှစ်သမီးလေးသူက သူ့အဖေ မျက်နှာရိပ်ကဲ ကို ကြည့်ပြီး ဆိုရမယ့်နေရာရောက်ပြီဆိုရင် ရှမ်းသံဝဲ၀ဲလေးနဲ့ ကြိုးစားပြီးဆိုတတ်တဲ့သီချင်းလေးတစ်ပုဒ်ရှိပါတယ်။
အဲ့ဒါလေးက သူဆိုတာနားထောင်ရင်း သူ့ကို အရမ်းချစ်မိစေပါတယ်။
သူဆိုတာက "တောင်ကျွန်းပေါ်မှာ...ဘုရားတစ်ဆူ''တဲ့ သတိတောင်ရလာပြီ။

ရန်ကုန်သားကျွန်တော့မောင် ဦးကျောက်လုံး ။:D
သူ့ကို ငယ်ငယ်က အတိုင်တောလည်းထူတယ်။
ရုပ်ရှင်မင်းသား ဦးကျောက်လုံးနဲ့ ငိုရင်တူလွန်းလို့ အဖွားပေးတဲ့နံမည်ပါ..
ခုတော့ ရေကြောင်းအရာရှိကြီးကျွန်တော့မောင်လေးက အရမ်းချောနေပါတယ်...:P နွေရာသီကျောင်းပိတ်ရက်တွေမှာ သူနဲ့ကျွန်တော် သီချင်းတွေ ဆိုပြီး အသံသွင်းတတ်လေ့ရှိပါတယ်။
Recorder ကတော့ သူ့ဖေဖေပါ ဦးရဲပါပဲ... ၇တန်းကျောင်းသူကျွန်တော်က ညမွှေးပန်း ကို "ညတုန်းကတွေ့ရတဲ့ကောင်မလေးတစ်ယောက်"...ဆိုပြီး
သီချင်းဆုံးခါနီး အသံကို ချလိုက်ပြီး လူကလည်းနောက်ကို ဆုတ်ဆုတ်သွားပါသေးတယ်။ဦးရဲဆို ခုထိပြောတုန်းပါ...
ကျွန်တော့်ကို ဥာဏ်များလွန်းလို့တဲ့ အဟီး။
မောင်လေးကိုဟိန်းကတော့ သူ့အကြိုက်ဆုံး ငရုတ်သီး သီချင်းကို ဆိုပါတယ်...သူကသီချင်းဆို အကောင်းဆုံးနဲ့ ရုပ်အချောဆုံးပါ..ကျောင်းပြန်ဖွင့်ရင် သူမို့ လူတိုင်းနံမည်ကို ရှေ့မှာတပ်ပြီး စားအရှည်ကြီးရေးနိုင်ပါတယ်...
နံမည်တွေကိုလည်း ကြီးစဉ်ငယ်လိုက်စီပြီးရေးပါတယ်။သူက ကျွန်တော့်ကို လွမ်းတိုင်း အသံသွင်းထားတဲ့ အခွေလေးကိုနားထောင်ကြောင်းလည်း ပါ ပါသေးတယ်...လွမ်းမိပါတယ်...ဦးကျောက်လုံးရယ်.:D

ဒီပုံလေးကတော့ ကျွန်တော်၊ဖိုးတေဇာ၊ချောစုနဲ့ ကိုဟိန်း(ဦးကျောက်လုံး) တို့ရဲ့ ရေကူးပြီး အသားတွေပြာနေတဲ့ ပုံပါ...။
ကျွန်တော်တို့တွေ အရင်လို အတူပြန်ဆုံဖို့ဆိုတာ တကယ်မလွယ်တော့တာပါ...သူတို့တွေကအိမ်ထောင်တွေ ကလေးတွေနဲ့ပါ...တာဝန်တွေ။လုပ်ငန်းခွင်တွေနဲ့ ကျွန်တော်တို့ အားတဲ့အချိန်တွေလည်း မတူကြတော့ ပြန်ဆုံဖို့မလွယ်တော့ဘူး။သတိရမိလွန်းလို့ သီချင်းတွေပြန်နားထောင်ရင်း မောင်လေးတွေအတွက် ဒီပို့စ်လေးတင်ပါတယ်...။
(ဓာတ်ပုံလေးတွေကတော့ ငယ်ငယ်ကရိုက်ထားတဲ့ ပုံလေးတွေကိုပါလာသလောက် ပြန်တင်ထားတာပါ)
အားလုံးကိုကျေးဇူးတင်ပါတယ်....
ရနံ့ချို

ခွန်အားဖြည့်မိငယ်(ကိုနေ၀င်း)

ပန်းရောင်အလွမ်း - ကိုအောင်

အသည်းကွဲတဲ့ ညတို့မှာ ကြယ်လေးများရယ်ပြောပေးပါ..ပြန်လာခဲ့ပါ..

ညစဉ်တိတ်ဆိတ်တဲ့ မိုးသားထက် ကြယ်တွေကြည့်ရင်းနဲ့ ဆွေး တယ်..
ငါအလွမ်းပြေ..




အိပ်မပျော်သေးတဲ့အတူတူ သီချင်းလေးတွေပဲ နားထောင်နေဖြစ်တယ်..။ ဟေး.. ပိုင်ဆိုင်ချင်တယ် နေ့ရက်တွေ...
သိပ်ချစ်ရတဲ့ အချစ်တွေ သူ့အတွက် အိပ်မက်ဖြစ်ပါစေ..။
မိုးလင်းတော့မယ် အိပ်လိုက်ဦးမယ် ကွယ်.။ ကျွန်တော် လောလောဆယ် ပို့စ်အသစ်တင်နိုင်ဦးမှာ မဟုတ်သေးဘူး။ မအားသေးလို့ပါ။ ဒီနေရာလေးက ကျွန်တော့် အတွက် အိမ်လေးတစ်လုံးဆိုလည်း မမှားပါဘူး။ တစ်နေ့တာရဲ့ နောက်ဆုံးကွန်းခိုရာဟာ ဒီအိမ်လေးထဲမှာပါပဲ။ လာလည်သူလေးတွေကို တွေ့တော့လည်း ပို့စ်လေးတွေ တင်ပေးချင်မိတယ်။ ဘယ်လိုပဲ ရောက်လာလာလေ။ အိမ်ရှင်တာဝန်တော့ ကျေချင်မိတယ်။ အခုတော့ နားလည်ပေးကြပါနော်။ နောက်ကိုလည်း လာလည်ပါ။ ကြိုးစားပါမယ်။ အားလုံး ရွှင်လန်းချမ်းမြေ့ကြပါစေ။

ချစ်တဲ့
ရနံ့ချို

ဘကြီးအောင် ညာတယ်...

“အရှေ့ကျောင်းသား သူတောင်းစား၊ လယ်ပေါ် ကျောင်းသား အကောင်းစား။ ကျောက်မီးသွေးမို့ မည်းသကို၊ တို့ကျောင်းသားမို့ ရဲသကို။

ဟေ့လာမောင်ရို့ဝါး”ဟု အားရပါးရ ဆူညံစွာ အော်ဟစ် ပြေးလွှားလာကြသော ကလေး တစ်စုသည်ကား လယ်ပေါ် ဘုန်းကြီး ကျောင်းသားကလေးများ ဖြစ်ကြ၏။ ယင်းတို့ ကျောဘက် တင်းချ လယ်တစ်ကွက်လောက် အကွာတွင် ချည်လုံချည်ကို ပြာတာကွင်း သိုင်း၍ သင်တိုင်း အင်္ကျီကို လျော့ရိလျော့ရဲ ၀တ်လျက် ခေါင်းငိုက်စိုက်နှင့် တစ်လှမ်းချင်း လာနေသော မောင်ချစ်သည် “ဧ၀ံမေသုတံ ဧကံသမယံ”ဟု တတွတ်တွတ် ရွတ်လျက်ရှိ၏။

ဆေးတစ်အိုးကျွမ်းလောက် အကြာတွင် အရှေ့သို့ လှမ်းကြည့်လိုက်ရာ ပန်းပုဆရာကြီး ဦးအောင်ချာ ကနားဖျင်းထဲ၌ ကျောင်းသား သူငယ်ချင်းများ ၀ိုင်းအုံ နေသည်ကို တွေ့ရလေသည်။ မိမိသည်လည်း အကြောင်းကို သိလိုသောကြောင့် ပြေးသွား တိုးဝင်ကြည့်ရှုလေ၏။

ဦးအောင်ချာသည် ဆင်စွယ် မင်းသမီး ရုပ်ကလေး တစ်ခုကို ထုလျက်ရှိ၏။ ထုလုပ်စ ဖြစ်၍ ရုပ်လုံးပေါ်ရုံမျှပင် ရှိသေးသော်လည်း အရုပ်ကလေးမှာ နွဲ့နောင်းဖြူဖွေး ချစ်စရာကလေး ဖြစ်ပေ၏။ အတန်ကြာသော အခါ မောင်ထွေး၊ မောင်ခွေး၊ ဖိုးစံ၊ ဖိုးလှတို့ တစ်စု ထပြန်သွားလေ၏။ မောင်ချစ်ကား မြေကြီးပေါ်တွင် ဒူးထောက်၍ ကွပ်ပျစ်ခါးပန်းတွင် မေးတင်ပြီးလျှင် အငေးသား ကြည့်လျက်ပင် ရှိသေး၏။

“ဘကြီးအောင် ဒီမင်းသမီး ရုပ်ကလေးကို ဘယ်သူ့ပေးဖို့ ထုနေတာလဲဟင်”
ဟု မျက်စိကလေး ပေကလတ်လုပ်၍ မေးလေ၏။ ဆောက်ပုတ်နှင့် ဆောက်ကလေးကို အသာချ၍ ဆောက်ပုံးထဲတွင် ဆေးလိပ်တိုကို စမ်းနေသော ဦးအောင်ချာက

“ငါ့တူ လိုချင်လို့လား၊ ငွေတစ်ကျပ် ယူခဲ့ရင် ဘကြီးပေးမယ် သိလား”
ဟု အမှတ်မဲ့ ပြောလိုက်သောအခါ မျက်မှောင်ကြုတ်ရင်း ခေါင်းကုတ်လျက်

“ငွေတစ်ကျပ် ဆိုတာ ဘယ်နှပြားလဲ ဘကြီးအောင်ရဲ့”
ဟု မေးပြန်လေ၏။ ပန်းပု ဆရာကြီးလည်း ဆေးလိပ်ကို ချ၍ လက်ဖ၀ါး နှစ်ဖက်ကို ထောင်ပြလျက်

“ဆယ်ပြား ဆယ်ပြား ခြောက်ခါ၊ နောက်ပြီးတော့ လေးပြားထည့်၊ ပေါင်းခြောက်ဆယ့်နဲ့ လေးပြား၊ အဲသလောက်ကို တစ်ကျပ်ခေါ်တယ်။ ကြားလား”
ဟု ကလေး သူငယ်များကို ချစ်ခင်သော ၀ါသနာ ရှိသည့် အတိုင်း စိတ်ရှည်လက်ရှည် ခြေဟန်လက်ဟန်နှင့် ရှင်းလင်း ပြောပြလေ၏။

“၆၄ ပြားပေးရင် ကျွန်တော် ဒီအရုပ်လေးကို တကယ်ပဲ ရမလား၊ နောက်တော့ မညာနဲ့နော် ဘကြီးအောင်”
ဟု ပြောရင်း သျှောင်ဆံမြိတ်က လေးကို ချာချာလည်အောင် ပတ်ရစ်လျက် အိမ်ရှိရာသို့ ရွှင်လန်း ၀မ်းမြောက်စွာ ခုန်ပေါက် ပြေးလွှားသွားလေ၏။

မောင်ချစ်သည် နေ့လယ်ချိန် ကျောင်းတွင် မုန့်ဝယ် စားဖို့ရန် မိခင် ပေးလိုက်သော တစ်ပြား၊ တစ်ပြားသော အသပြာကို မသုံးရက်၊ မစွဲရက်ဘဲ အင်္ကျီ သင်ပုန်းခေါင်းတွင် အပေါက် ငယ်ဖောက်၍ စုထားသည်မှာ ခြောက်ပြားမျှရလေ၏။ တစ်ထွှာမျှ ကျယ်သော မိမိဝမ်းခေါင်း သမုဒ္ဒရာ အတွက်မူကား နေ့ဆွမ်းစား ကလတက်ခေါက်တွင် ဘုန်းတော်ကြီး ဦးခေမာ ဝေသော ငှက်ပျောသီး တစ်လုံးနှင့် ကျေနပ် ဖူလုံလျက် ရှိလေ၏။

ဆင်စွယ် ရုပ်ကလေးသည် တစ်နေ့တခြား သားနားကြော့ရှင်း၍ လာ၏။ သွားကလေးများ ပေါ်လု မတတ်ရှိအောင် ပြုံးလိုက်ရန် ဟန်ပြင်နေသော အသွင်သည် အိပ်ပျော်နေသော ညအချိန်တွင်ပင်လည်း မောင်ချစ် မျက်လုံးတွင်းမှ မထွက်။ ကြည့်ရပါများလေ အရုပ်ကလေးမှာ လှလာလေ၊ လိုချင်စိတ် ပွားလာလေ ဖြစ်ရကား တစ်နေ့မှ တစ်ပြားတစ်ပြား စုရသည်ကို အလွန်ဖင့်လေ ကြန့်ကြာသည်ဟု သိလာလေ၏။ ပိုက်ဆံ ရလွန်းလို၍ ဥပုသ်နေ့များကိုပင် စာသင်ရက် ဖြစ်ပါစေတော့ဟု ဆုတောင်းမိ၏။ တစ်ပေါက်တစ်လမ်းက ဘယ်နည်းနှင့် ပိုက်ဆံ ရအောင် ကြိုးစား ရပါမည်နည်းဟု ကြံစည်ပြန်၏။

ထိုစဉ်အခါက ကမ္ဘာ စစ်ကြီးအတွင်း ဖြစ်၍ ကျောက်တံ အလွန်ရှား၏။ မောင်ချစ်သည် အစ်ကိုကြီး ကိုသစ်၏ ကျောက်သင်ပုန်း ကွဲများကို ညောင်ရေအိုးစင်မှ ယူ၍ ညဥ့်နက်သန်းခေါင် မရှောင် မှိုင်းတလူလူ ထွက်နေသော ရေနံဆီ မီးခွက်ကြီးကို ထွန်းညှိလျက် ချွန်တက်သော ဖဲထီး သံချောင်းဖြင့် ကျောက်တံ တိုက်လေ၏။ ကျောက်တံရောင်း၍ ပိုက်ဆံ ခြောက်ပြားရ၏။ ကျောင်းသားကြီး ဖိုးတေက အနိုင်ကျင့်၍ မပေးဘဲ ထားသော အကြွေးတစ်ပြား အတွက် တွေးမိတိုင်း ဆွေးမိ၏။

တစ်ဆယ့်နှစ်ပြားမျှ ရလာသော အခါ အင်္ကျီသင်ပုန်း ခေါင်းမှာ မဆံ့ပြီဖြစ်၍ နှစ်ဖက် ပိတ်ကြသောင်းဝါး တစ်ဆစ် တွင် ထိပ်က အပေါက်ဖောက်ကာ ဝေလခေါင်း၊ ဂျော့ခေါင်း၊ နတ်ဖိုးချွန် စသော တံဆိပ် အမျိုးမျိုး ခတ်နှိပ်သည့် ကြေးပြား တစ်ဆယ့်နှစ်ပြား တိတိကို သွင်းလှောင် သိုမှီးထားလေ၏။ နှစ်ဆန်း တစ်ရက်နေ့တွင် ဒွေးလေးညို ချစ်စနိုး၍ ပေးသော သူငယ်ဖော် မောင်ထွေးက အလိုက်နှစ်ပြား ပေး၍ ပိုက်ဆံချင်း လဲစဉ် မလဲရက်ဘဲ တွယ်တာခဲ့သည့် ထုံးအမှတ်နှင့် ဒေါင်းပိုက်ဆံ ကလေးကိုလည်း ဖျာအောက်မှ ထုတ်ယူ၍ ကြေးပြား အဖော်များ ရှိရာ ကြေးတိုက်တွင်းသို့ သွတ်သွင်းလိုက်လေ၏။ ကြေးပြား အရေအတွက်ကိုလည်း ၀ါးကြောတွင် စူးဖြင့်ခြစ်၍ မှတ်ထားလေ၏။

“ပဲဟင်းချက်တဲ့နေ့က တစ်ပြား၊ ဘကြီးထူး ကျွဲပျောက်တဲ့ နေ့က တစ်ပြား”

စသည်ဖြင့် လက်ချောင်း ကလေးများကို ချိုးကာ ချိုးကာ ပိုက်ဆံစာရင်း တွက်ရ၊ စစ်ရသည်မှာ နေ့စဉ်နှင့် အမျှဖြစ်၏။ ရေတံလျှောက်ထဲမှာ ထားရကောင်းနိုးနိုး၊ သင်္ဘောကြမ်းပေါ်တွင် ၀ှက်ထားရလျှင် လုံနိုးနိုးနှင့် ပိုက်ဆံဘူး နေရာကြပ် ပြောင်းရသည်မှာလည်း အမောပင် ဖြစ်၏။ အရုပ်ကလေးကို ရလျှင် ထည့်ထားဖို့ရန် ထန်းရွက်ဖာ ချောကလေးကို အမျိုးမျိုး ပြုပြင်ဆင်ယင် မွမ်းမံရသည်မှာလည်း မအားပင် ဖြစ်လေ၏။

ဈေးသည် ဒေါ်ခါဥ၏ တောင်းနီးထဲ၌ အငွေ့ထောင်းထောင်းနှင့် ကောက်ဦး ငချိပ်ပေါင်းကို မြင်ရသော အခါ သွား ရည်ယိုမိ၏။ သို့ပါသော်လည်း ၀ယ်မှရသော သရေစာတို့ကို သပိတ် မှောက်လေ၏။ သူငယ်ဖော်တို့ ဖန်ဒိုးဝယ်၍ ဂေါ်လီ ရိုက်သောအခါ ကလေးတို့ ဘ၀ အများနည်းတူ ကစားလိုပါ သော်လည်း မိမိတွင် ရှိရင်းစွဲ စည်ပတ်သံခွေ အဟောင်းကြီးကို ကျောင်းဝိုင်း ပတ်လည်တွင် လှည့်ပတ်ရိုက်လျက် တစ်ယောက် ထီးတည်း ကျေနပ်တင်းတိမ် ရလေတော့၏။ သို့ဖြင့် တစ်ပြား တိုးလျှင် တစ်မျိုး ၀မ်းသာလျက် စုဆောင်း လာခဲ့ရာ ပိုက်ဆံ သုံးဆယ့်လေးပြား ပိုက်မိသော နေ့သို့ ရောက်လာလေသတည်း။

ညနေ လေးနာရီ ကျောင်းလွှတ် ခေါင်းလောင်းသံသည် မောင်ချစ်၏ နှလုံးသွေးကို နှိုးဆွ လိုက်လေ၏။ ဘုရားရှိခိုး ဆုံးခါနီး “အာမ”ဟု ဆိုမိလျှင်ပင် “ဘန္တေ”ကို မစောင့်နိုင်ဘဲ ထ၍ ပြေးလေရာ အစောင့် ကိုရင်ကြီး တစ်ပါးက အရင်လိုရ ကောင်းလားဟူ၍ ထိပ်ကို ဂေါင်ဂေါင်မြည်အောင် ခေါက်လိုက်၏။ အမှု မထားမိ။ လမ်းတွင် ခလုတ်တိုက်၍ ခြေမ ကွဲသွားသော်လည်း နာရမှန်း မသိ။ ဦးအောင်ချာ့ ကနားဖျင်းနား ရောက်သောအခါ အတင်း တိုးဝင်သွားလေ၏။ ဖော့ဦးထုပ်ကို ဆောင်း၊ ဘောင်းဘီ အပြာကို ၀တ်လျက် ကွပ်ပျစ်ထက်တွင် အခံ့သား ထိုင်ရင်း မင်းသမီး ရုပ်ကလေးကို ဘယ်ပြန် ညာပြန် ပယ်ပယ်နယ်နယ် ကိုင်တွယ် ကြည့်ရှုနေသော လူကြီးတစ် ယောက်ကို မြင်မှသာ ကိုယ်အရှိန် သတ်၍ ပြောနေကြသော စကားကို ကြားမိလေတော့၏။

“ဘယ့်နှယ်လဲ ဆရာကြီးရဲ့၊ ကျုပ်ပြောတဲ့ အဖိုးနဲ့ပဲ ပေးလိုက်မယ် မဟုတ်လား။ ခင်ဗျားတို့ အရပ်မှာ ဒီအရုပ်ကလေးနဲ့ တန်တဲ့ အိမ်တစ်အိမ်မှ မရှိပါဘူး။ ၀ယ်နိုင်မယ့် လူလည်းရှိမှာ မဟုတ်ပါဘူး”

“မှန်ပါ။ ၀န်ထောက်မင်းဖို့ ဆိုရင်တော့ အလကား တောင်းလည်း ပေးရမှာပါပဲ။ နို့ပေမယ့် အချောသပ် အမွှမ်းတင်ဖို့ လေး၊ ငါးရက်လောက် ဆိုင်းစေချင်ပါတယ်။ ပြီးရင် ပြီးချင်း ၀န်ထောက်မင်းတို့ဆီကို လာပြီး ပို့ပါမယ်”

ထိုမျှကို ကြားရလျှင်ပင် မောင်ချစ်၏ အသည်းနှလုံး အူသိမ်၊ အူမတို့သည် ကြွေကျမတတ် ဖြစ်လေ၏။ အရုပ် ကလေးကို အတင်းလု၍ ပြေးလိုသော စိတ်ပေါ်လာသော်လည်း ၀န်ထောက်မင်းဟု ကြားရရုံမျှနှင့်ပင် ရင်ဒူး တုန်နေရသော မောင်ချစ်မှာ အဘယ်သို့ ၀ံ့ရဲပါအံ့နည်း။ ခါးကြားက ခြောက်လုံးပြူး သေနတ်သည်လည်း မောင်ချစ်၏ အကြံကို သိသည့် အလား မောင်ချစ်ဆီသို့ စိမ်းစိမ်းလှည့်၍ ခြောက်လှန့်မောင်းနှင် လေ၏။

ဝဲလာသော မျက်ရည်ကို အနိုင်နိုင် ထိန်း၍ မိမိဘက် သို့ ကျောခိုင်းနေသော ဆင်စွယ်ဒေ၀ီ ကလေးအား နောက်ဆုံး ကြည့် ကြည့်လျက် ထွက်လာလေ၏။ လမ်းကြားငယ် တစ်ခု အတွင်းမှ
“ဟိုကောင်ကလေး ညိုတိုတို၊ တို့ကိုကြိုက်လို့ ငို၊ နင် ငိုပေမယ့် အလကား တို့အမေက မပေးစား”
ဟု ထွက်ပေါ်လာသော တေးသံသည် တေးဆိုသူအား နှလုံးပွားဖွယ်ပင် ဖြစ်သော်လည်း မောင်ချစ်၏ နှလုံးသားကို ကား ဓားပါးနှင့် မွှန်းလိုက်လေတော့သတည်း။

တစ်ဆယ့်ငါးရက်မျှ ကြာသောအခါ ခေါင်းထက်တွင် တဘက်ကိုယ်စီ တင်ထားသော မိန်းမကြီး တစ်စုနှင့် ယောက်ျားကြီး တစ်ယောက်တို့ မောင်ချစ်တို့၏ ခြောက်သွေ့သော ခြံကလေး အတွင်းသို့ ၀င်သွားသည်ကို မြင်ရပါသည်။ အိမ်ရှေ့ ခွေးကတက်ကို တက်မိလျှင်ပင် တိုင်ဖုံးနား၌ မျက်ရည်စက် လက် ဦးဆံဖားလျားနှင့် ထိုင်နေသော မိန်းမ တစ်ဦးသည် ယောက်ျားကြီး၏ ခြေစုံကို ပြေးဖက်လျက်
“အမယ်လေး ကိုရင်အောင်ရဲ့၊ မောင်ချစ် ဖြစ်ပျက်ပုံတွေ မြင်ဝံ့သေးရဲ့လားရှင့်၊ မောင်ချစ်ရေ အမေ့သားကြီးရဲ့၊ အမေ လိုက်ခဲ့မယ်ကွယ့်နော် ဟီးဟီး”

ဟု ဟစ်အော်ပြောဆို ငိုကြွေး မြည်းတမ်းလေ၏။ ဦးအောင်ချာလည်း မောင်ချစ် အလောင်းနားတွင် မလှုပ်မယှက် ထိုင်နေသော မောင်ချစ်ဖခင်အား
“ဘယ့်နှယ် ဖြစ်ရတာလဲ မောင်ဖိုးငွေရဲ့၊ ကိုရင်လည်း မြို့တက်သွားတာ ဆယ့်လေးငါးရက် ကြာသွားလို့ ဘာသတင်းမှ မကြားမိဘူး။ အခု ပြန်ရောက်ရောက်ချင်းပဲ အိမ်မှာ ထိုင်တောင် မထိုင်ခဲ့ဘဲ ပြေးလာခဲ့တာပဲကွယ့်”ဟု ပြောလေ၏။

“ကိုယ်ရင်ရယ်၊ ဘာရောဂါရယ်လို့လည်း မပြောတတ်ပါဘူး။ တမှိုင်မှိုင်၊ တတွေတွေနဲ့ ထမင်းမစား ဟင်းမစား၊ တစ်ခါတလေ သူ့အမေ ကျွေးလို့ ဆန်ပြုတ်ကလေး တစ်ဇွန်းလောက် ၀င်သွားပေမယ့် ချက်ချင်း အန်ပစ်လိုက်တာပဲ။ ပယောဂဆိုလို့ ဆရာသြ ခေါ်ပြပါလည်း ဘာမှ မထူးခြားပါဘူး။ ကလေးကို ညှဉ်းဆဲသလိုသာ ဖြစ်နေတာပဲ။ မေးလို့ လည်း မပြောဘူး။ မနေ့ညကတော့ သူ့အမေကို ခေါ်ပြီး သူစုထားတဲ့ ပိုက်ဆံ ငါးမူး နှစ်ပြားကို သူ့ဆရာတော်ကို လှူလိုက်ပါလို့ မှာပြီးတော့ ကိုရင်အောင်ကို မေးတာပဲ။ မြို့သွားတယ်လို့ ပြောတော့ အတန်ကြာကြာ ဘာမျှ မပြောဘဲ မောနေပြီး ဘကြီးအောင် ညာတယ်လို့ မပီတပီ ပြောရင်း အသက် ပျောက်သွားတာပဲ”ဟုပြော၍ လုံချည်စဖြင့် မျက်ရည် သုတ်လေ၏။ ဦးအောင်ချာလည်း စဉ်းစား၍ အကြောင်းရင်းကို ရိပ်မိသော အခါ မျက်နှာ ညှိုးငယ်၍ သွားလေတော့သတည်း။

ယခုအခါတွင်ကား ရွာကလေး၏ အနောက်ဘက် နွားစားကျက် အနီး ထိန်ပင်ကြီး တောင်ယွန်းရှိ သင်္ချိုင်းကုန်းထက်တွင် ထီးတည်းသော အုတ်ဂူကလေး တစ်ခုကို တွေ့နိုင်ပါသည်။ အချစ်ဂူ ဟူ၍လည်းကောင်း၊ မောင်ချစ်ဂူ ဟူ၍လည်းကောင်း အမည် နှစ်မျိုးဖြင့် ခေါ်ကြရာ မည်သည်ကို အမှန်ဟူ၍ မပြောနိုင်ပါ။ ဂူကလေး၏ အရှေ့မျက်နှာ လိုဏ်ပေါက် ကလေးထဲတွင် ကျွဲကျောင်းသား၊ နွားကျောင်းသားတို့၏ လက်ချက်ကြောင့် ကျိုးပဲ့ ပျက်စီးနေသော အရုပ်ကလေး တစ်စုံကို တွေ့နိုင်ပါသေးသည်။ လိုဏ်ဝ အင်္ဂတေတွင် သွင်းနှံထားသော ကျောက်ပြားငယ် ထက်တွင်ကား “လို၍ မရသော ဆင်းရဲ” ဟု စာတန်း ထိုးထားပါသည်။ ကျွန်တော်၏ ဘိုးအေအား မေးမြန်း ကြည့်ရာ သုံးနှစ်လောက်က ပျံတော်မူသွားသော တောထွက်ကြီး ဦးဣန္ဒ၏ လက်ရာ ဖြစ်သည်ဟု သာမန်မျှသာ သိရပါ သတည်း။

မင်းသုဝဏ်
(ရွှေအမြုတေ မဂ္ဂဇင်း၊ဖေဖေါ်ဝါရီလ ၂၀၁၁)

စကားကြီး စကားကျယ် မပြောနဲ့

လူတွေကလေ..
တယ်လည်း ကြီးကြီးကျယ်ကျယ်
ပြောချင်ကြသကိုး..။
လုပ်တာကသာ ဘာမှမဟုတ်တာ
အပြောတွေကတော့
ကျလောက်တယ် ... မိုးပေါ်မှာချည်းပဲ
နောက်ဆုံးတော့လည်း
သူသူငါငါလိုပါပဲ
လမ်းဟောင်းမှာပဲ တ၀ဲလည်လည်နဲ့
ကျင်လည်ကြတာပဲမလား။
မရယ်နဲ့ မရယ်နဲ့
သူများကို သွား မလှောင်နေပါနဲ့
ခင်ဗျားရော ကျုပ်ရော
ဘာများထူးခြားနေလို့လဲ
ဒီလို အုတ်ရောရော ကျောက်ရောရော
လောကထဲ ခင်ဗျား ဘာထူးချင်နေတာလဲ။
ဒီပုတ်ထဲက ဒီပဲ
မှာချင်တာတစ်ခုပဲ ရှိတယ်..
အပြောတွေမစောနဲ့။
ထမင်းကို ကုန်အောင်စားသွား
စကားတွေနဲ့တော့ ထုံးမတို့ချင်စမ်းနဲ့။
ဟုတ်လား..
လောကမှာ ရှင်းရှင်းလေးပဲ
ကိုယ့်လမ်းကို သွား
အပြုသဘောနဲ့လည်း ခလုတ်လာမတိုက်နဲ့။
အပျက်သဘောနဲ့လည်း ဖားပြုတ်လာကိုက်နဲ့။
နောက်တော့ တရုတ်ပါ အချောင် ရိုက်ခံနေရမယ်။

ရနံ့ချို

ရှင်ကွဲ

တမာပင်လေးတွေ စီတန်းပေါက်နေတဲ့ လမ်းကလေးထဲကို မြင်းလှည်း ချိုးကွေ့ဝင်လိုက်တာနဲ့ အိမ်ရဲ့အနံ့ကို ကျွန်မရတယ်။ ဟိုး..... လွန်ခဲ့တဲ့ အနှစ်သုံးဆယ်ကျော်က ကျစ်ဆံမြီး နှစ်ဖက်ချထားတဲ့ ကောလိပ်ကျောင်းသူဘ၀နဲ့ ပြန်လာတုန်းကလည်း သည်အနံ့ပါပဲ။ လုံခြုံနွေးထွေးတဲ့ အိမ်ရဲ့အနံ့ဟာ ဘယ်တော့မှ ပြောင်းလဲသွားမှာ မဟုတ်ဘူးထင်ပါရဲ့။ ပြောင်းလဲသွားတာကတော့ ကျွန်မပဲပေါ့။ မျက်နှာချင်းဆိုင် မြင်းလှည်း မှန်ချပ်လေးထဲမှာ နဖူးဆံစတွေ ဖြူဖွေးစ ပြုနေတဲ့ အသက်ငါးဆယ်ကျော် မိန်းမတယောက်။


အိုး... ဟိုမှာ ကျွန်မတို့ အိမ်ကို မြင်ရပြီ။ ရေနံတွေ မည်းဝနေတဲ့ နှစ်ထပ်အိမ်ကြီးထဲမှာ ကျွန်မအဖေရယ်၊ အမေရယ်၊ မမကြီးရယ် ရှိတယ်။ ၀မ်းနည်းစရာနဲ့ ပြန်ပြန်၊ ၀မ်းသာစရာနဲ့ ပြန်ပြန် အိမ်ကိုမြင်လိုက်တာနဲ့ ဘာဖြစ်လို့များ အားရှိ လုံခြုံသွားရတာ ပါလိမ့်နော်။

မန်းကျည်းပင်၊ သရက်ပင်တွေကြားမှာ ငြိမ်သက် တိတ်ဆိတ်နေတဲ့ အိမ်ရှေ့မှာ ခဏ ကျွန်မရပ်နေပြီးမှ ၀င်းတံခါး တွန်းဖွင့် ၀င်လိုက်တာနဲ့ ကျွန်မရင်တွေ တဒိတ်ဒိတ် ခုန်လာတယ်။ အမေ ... အမေ့ကို ကျွန်မ ဘယ်လို တွေ့ရမှာပါလိမ့်။ သူ အင်မတန် ချစ်တယ်ဆိုတဲ့ အငယ်ဆုံးသမီး ကျွန်မကို အမေ ဘယ်လို ဆက်ဆံမှာပါလိမ့်နော်။

'မမကြီး'

အိမ်ရှေ့ တံခါးနားကနေ မမကြီးကို ကျွန်မ တိုးတိုးခေါ်လိုက်တယ်။ မမကြီး ကျွန်မကို မျှော်နေတယ် ထင်ပါရဲ့။ ချက်ချင်းပဲ အောက်ထပ် အိပ်ခန်းထဲကနေ ထွက်လာတယ်။ အဲသည် အိပ်ခန်းဟာ အဖေနဲ့ အမေ့ အိပ်ခန်း။

'ညည်း မိုးချုပ်မှ ရောက်မယ်ထင်လို့'
မျက်နှာထားတင်းတင်း၊ စကားပြတ်ပြတ် ပြောတတ်ပြီး အင်မတန် ပါးလှပ်တဲ့ နှုပ်ခမ်းနဲ့ အင်မတန် ပါးလှပ်တဲ့ ကိုယ်ခန္ဓာကို ပိုင်ဆိုင်သူ ကျွန်မရဲ့ မမကြီးဟာ ဘာမှ မပြောင်းလဲသလိုပဲ။ ကျွန်မ မလာဖြစ်တဲ့ တနှစ်အတွင်းမှာ ပြောင်းလဲသွားတာကတော့ မမကြီးရဲ့ ဖွေးဖွေးလှုပ်နေတဲ့ ဆံပင်တွေပဲ။ မနှစ်က အဖေနဲ့ အမေရဲ့ ရှစ်ဆယ်ကိုးနှစ်ပြည့် မွေးနေ့အလှူမှာတုန်းက မမကြီးဆံပင်တွေ ဒါလောက် မဖြူသေးပါဘူး။ မမကြီးက ကျွန်မအထက်က အဖတ်မတင်တဲ့ အစ်မနှစ်ယောက်ရဲ့ အထက်၊ အေးလေ မမကြီး ငါးဆယ့်ရှစ်နှစ် ရှိပြီပဲ။ ခြောက်ဆယ်နားနီးပေါ့။ ဒါဆို အစ်ကိုကြီးက အသက်ခြောက်ဆယ် ရှိခဲ့ပြီပေါ့နော်။

'အမေရော မမကြီး'
'ဒေါ်လေးတို့ အိမ်မှာ သူတို့ ညီမတွေ ငယ်ငယ်ကဟာတွေ သတိရတယ် ထင်ပါရဲ့အေ။ ဘုရားပွဲ သွားမလို့တဲ့ ပိုးလုံခြည်တွေ ဘာတွေ ထုတ်ဝတ်ပြီး ဇွတ်ထွက်သွားတာပဲ'
ကျွန်မရင်ထဲ တမျိုးကြီး ခံစားရတယ်။ ပြီးတော့ အဖေ့ကို ချက်ချင်းသတိရလိုက်မိတယ်။

'အဖေကိုရော မမကြီး ဘယ်လိုလဲဟင်'
အလျင်စလို မေးလိုက်တဲ့ ကျွန်မကို မမကြီးက ဘာမှ မပြောပဲ အသံပြတ်နဲ့ 'လာ' တဲ့။ အဖေနဲ့ အမေ အိပ်ခန်းထဲကို ရှေ့က ၀င်သွားတယ်။ မြန်မာဆေးနံ့၊ ဘုရားပန်းနံ့၊ ပြီးတော့ အဖေနဲ့ အမေနဲ့ အနံ့တွေ လွှမ်းခြုံထားတဲ့ အခန်းထဲက ကနုတ်ပန်းအခက်အနွယ်တွေနဲ့ ဟောင်းနွမ်းရှေးကျ ခံ့ညားလှတဲ့ ကျွန်းခုတင်ကြီး ပေါ်မှာ အဖေ အိပ်ပျော်နေရှာတယ်။

'အဖေနေမကောင်းဘူးလား၊ ဒူးနာတာကရော'
'အေး... ဟုတ်တယ်၊ ဒူးကတော့ ဒီလိုပါပဲအေ၊ အမေက အဖေ့ကို လုံးလုံး မမှတ်မိတော့ဘူး'
'ဘာရယ်'
အို.... တကယ်ပဲလား။ မဖြစ်နိုင်လိုက်တာ။ အမေကလား။ အဖေ့ကို။

'ညည်း ဒီမှာ ကြာကြာနေနိုင်ရင်တော့ ကောင်းမှာပဲ'
'နေနိုင်ပါတယ်၊ နေလဲ နေရမှာပဲ မမကြီးရယ်၊ ကျွန်မ...'
အားကိုးတိုင်တည်ဖို့ ဟန်ပြင်လိုက်တဲ့ ကျွန်မစကားတွေကို မမကြီး ဘယ်တော့မှ နားမထောင်ပါဘူး။
'ငါ အမေ့ကို သွားခေါ်လိုက်ဦးမယ်၊ ညည်းအဖေ့နား စောင့်လိုက်ဦး၊ ပြန်မှ ထမင်းစားကြတာပေါ့။ အစ်ကိုကြီးတို့အိမ်က ထမင်းပို့တယ်၊ လာရင် ယူထားလိုက်'

စကားဆုံးတာနဲ့ မမကြီးခန္ဓာကိုယ် ပါးပါးလေး အခန်းပြင်ဘက်ကို လှစ်ခနဲ ပျောက်ကွယ်သွားခဲ့တယ်။ အဖေ့ ခုတင်ဘေးက ပက်လက်ကုလားထိုင်လေးပေါ်မှာ ကျွန်မကိုယ်ခန္ဓာကို ပုံချလိုက်မိတယ်။ မမကြီးဟာ ကျွန်မတို့ နှစ်ယောက်ကို ခုထိ ခွင့်မလွှတ်နိုင်သေးဘူးလား။ မမကြီးမှာ တရားမရှိနိုင်သေးဘူးလား။ အနွေးထည် အင်္ကျီအိတ်ထောင်ထဲက ကျွန်မရဲ့ ခရီးဆောင် စာအုပ်လေးကို ထုတ်လိုက်တယ်။ 'ဗုဒ္ဓယဉ်ကျေးမှုအခြေခံ' တဲ့။ စာအုပ်ရဲ့ ပထမစာမျက်နှာမှာ မမကြီးနဲ့ အဖေတို့ အမေတို့က မုန်းတဲ့ ကျွန်မချစ်လင်ရဲ့ လက်ရေးစောင်းစောင်း တွေကို မြင်ရတယ်။ 'ချစ်ဇနီး ခင်ထွေးရဲ့ အသက်ငါးဆယ်ပြည့် မွေးနေ့သို့' တဲ့။ ဘုရားရှိမခိုးတဲ့၊ ဘုရားစာမရတဲ့၊ တရားလဲမထိုင်၊ ပုတီးလည်း မစိပ်တဲ့ ကျွန်မချစ်လင်ရဲ့ အံ့သြစရာ မွေးနေ့လက်ဆောင်။ လွန်ခဲ့တဲ့ တပါတ်က ကျရောက်ခဲ့တဲ့ ငါးဆယ့်နှစ်နှစ်ပြည့် ကျွန်မရဲ့ မွေးနေ့မှာ အထီးကျန်ခြင်းကို ကျွန်မအတွက် မွေးနေ့လက်ဆောင်ပေးခဲ့တဲ့ ကျွန်မရဲ့ ချစ်လင်။

စာအုပ်လေးကို တဖျပ်ဖျပ်လှန်လှောရင်း 'ဓာရဏပရိတ်' ကို အာရုံပြု ရွတ်ဖတ်ဖို့ ကျွန်မကြိုးစားတယ်။

ဆယ့်ငါးပေ၊ ပေငါးဆယ်ရှိတဲ့ အခန်းလေးတခု၊ ခပ်နွမ်းနွမ်း ပရိဘောဂအနည်းငယ်။ ကျွန်မနဲ့ တချို့ လူတွေ မုန်းပြီး သူမြတ်နိုးကိုးကွယ်တဲ့ စာအုပ်တွေအပြည့်။ နေရာအနှံ့ ပုံစံအမျိုးမျိုး ဆေးလိပ်ခွက်တွေ။ အလွန် သပ္ပာယ်တဲ့ ဘုရားဆောင်လေးတခုလဲ ရှိတဲ့ ဒီအခန်းလေးထဲမှာ အိမ်ထောင်သက် အနှစ်သုံးဆယ်နီးပါး ကျွန်မတို့ ဖြတ်သန်း ခဲ့တယ်။ ကျွန်မ ကောလိပ်ကျောင်းသူဘ၀ တပိုင်းတစနဲ့ သူ့နောက် ခိုးရာလိုက်ခဲ့ကတည်းက တဖက်က ကျူရှင်ပြရင်း သူလုပ်ချင်တာတွေ လုပ်ရင်း ချို့တဲ့မှုဒဏ်ကို ခါးစည်းမခံနိုင်တဲ့ ကျွန်မက အိမ်ပြန်လက်ဖြန့်ရင် သည်အခန်းလေးထဲမှာ 'သင်း သွေးကို ငါတို့ ချစ်နေရဦးမယ်၊ နင်တို့ သားသမီးမရစေနဲ့' လို့ ဆိုတဲ့ မမကြီး ကျိန်စာကလည်း ကျွန်မတို့ကို ထိခဲ့တာကိုးနော်။

စာအုပ်လေးကို ကျွန်မ ပိတ်လိုက်တယ်။ မသိမသာ လူးလွန့်လိုက်တဲ့ အဖေ့ကို ကြည့်ရင်း ကျွန်မ၀မ်းနည်းလာတယ်။ ကျွန်မ ဘယ်သူ့ကို ပြောရမလဲ။ ညသန်းခေါင်ရဲ့ ဆူညံလှုပ်ခါနေတဲ့ လူခေါ် ကြေးခေါင်းလောင်းသံ။ ပြီးတော့ သူစိမ်းတွေ။ သူစိမ်းတွေနဲ့အတူ ကျွန်မရှေ့က ဖျတ်ခနဲ ပျောက်ကွယ်သွားပြီး အထီးကျန်ခြင်းကို ကျွန်မအတွက် ထားရစ်ခဲ့တဲ့ ကျွန်မချစ်လင်။ ကျွန်မ သိပ်ကြောက်တာပဲ အဖေ။ သူသာဆိုရင်တော့ ကျွန်မကို ပြောဦးမယ်။ 'မင်းဟာ ဘယ်တော့မှ ကြီးပြင်မယ့် မိန်းမ မဟုတ်ဘူး လို့'။

မှောင်စပြုလာတဲ့ အခန်းထဲမှာ မီးဖွင့်ဖို့ ကျွန်မ ထလိုက်တယ်။ မီးဖွင့်ပြီး အဖေ့ခုတင်နား ကျွန်မပြန်လာ တော့ အဖေရယ် နိုးနေပြီ။ ဒါပေမယ့် အဖေကျွန်မကို ဘာမှ မပြောခဲ့ပါ။ သူ့မျက်လုံးတွေ ဟိုဟိုသည်သည် လိုက်ကြည့်နေတယ်။ ပြီးတော့မှ 'ညည်းအမေရော' တဲ့။ ကျွန်မ ငယ်ဘ၀ တလျှောက်လုံး ကြားခဲ့ရတဲ့ အဖေ့ ရေရွတ်သံ။ ကျွန်မ ဘာပြောရမလဲ။

'အမေလား အဖေ'
ကျွန်မ စကားထစ်နေဆဲ အဖေ့မျက်နှာ ဖျတ်ခနဲ ညှိုးနွမ်းသွားပြီး မျက်လုံးတွေ ပြန်မှိတ်ပစ်လိုက်တယ်။ ခုတင်ဘေး စားပွဲလေးပေါ် ဓာတ်ဗူးလေးထဲက နွားနို့ကို အဖေသောက်နေကျ လက်ဖက်ရည်ပန်းကန်ပြား အပက်လေးထဲ ကျွန်မငှဲ့ထည့်လိုက်တုန်း......။

'စိတ်ချ၊ နက်ဖြန်ကျ လိုက်ပို့ပါ့မယ်လို့ဆို'
ဟော မမကြီးအသံ။ အမေလာပြီလား။ အဖေ့မျက်လုံးတွေ ပြန်ပွင့်လာတယ်။ ကျွန်မရင်တွေလဲ တဒိတ်ဒိတ် ပြန်ခုန်လာတယ်။ အမေ ဘယ်လို ဖြစ်နေမှာလဲ။

'လာပါအမေရဲ့'
အခန်းဝမှာ မမကြီးနဲ့အမေ ရုတ်တရက် ပေါ်လာတယ်။
'အမေ'
ပါးရေတွန့် ပါးပြင်မှာ သနပ်ခါးတွေနဲ့ အမေက ကျွန်မကို စိမ်းစိမ်းကြည့်နေတယ်။ လန်းဆန်းတက်ကြွမှု တမျိုး ပူးကပ်နေတဲ့ အသက်ကိုးဆယ်အရွယ်၊ ကျွန်မရဲ့ အမေဟာ ကျွန်မကို ကြည့်ရာက အဖေ့ဆီကို ဖျတ်ခနဲ လှမ်းကြည့်လိုက်တယ်။ ပြီးတော့ ကျွန်မ ငှဲ့လက်စ နွားနို့ပန်းကန်ပြားလေးပေါ်။ အို.... အမေ သတိရပါစေ။ ကျွန်မမျက်စိထဲမှာ အဖေ့မေးစေ့အောက်မှာ လက်ကိုင်ပုဝါလေးခံပြီး နွားနို့ ပန်းကန်ပြားလေးကို တိုက်နေတဲ့ အမေ။ အဖေ့ဒူးကို အမြဲတမ်း နှိပ်ပေးနေတဲ့ အမေ။ 'နင်အဖေရော' ဆိုတဲ့ အမေ့ပူပန်သံနဲ့ ပျာယာခတ် အမူအရာ၊ ကျွန်မအမေ့ကို မျှော်လင့်တကြီး ကြည့်မိတယ်။ ပြီးတော့ နွားနို့ပန်းကန်ကို ကျွန်မကောက်ကိုင်လိုက်ရင်း......

'ရော့လေ အမေ၊ အဖေ့ကို'
ကျွန်မစကားမဆုံးခင်မှာပဲ အမေဟာ အဖေ့ကို လက်ညှိုးငေါက်ငေါက် ထိုးလိုက်တယ်။
'ဒီအဘိုးကြီးက ဘယ်ကလဲ၊ သူများအိမ်မှာ ဘာလာလုပ်နေတာလဲ။ ခုထိမပြန်သေးဘူးလား၊ မိုးချုပ်လှပြီ'
'အို..... အမေ'
မျက်စိစုံမှိတ်လိုက်တဲ့ အဖေ့မျက်နှာကို ကျွန်မ တသက်မမေ့နိုင်တော့ပါ။
'ဟဲ့ အဘိုကြီး ကိုယ့်အိမ်ကို ပြန်လေ။ မိုးချုပ်လှပြီဆို၊ အသားအရေတွေက ဖြူဖပ်ဖြူရော်နဲ့ အဲ့ဒါ ဘယ်က တရုတ်အဖိုးကြီးလဲ ဟင်၊ ဘယ်ကလဲ'
မမကြီးက အမေ့ကို အတင်းဆွဲခေါ်သွားတယ်။ 'အဖိုးကြီး ပြန်တော့' ဆိုတဲ့ အမေ့အော်သံသဲ့သဲ့ကို ကျွန်မ တကယ်ကြားနေရတာပါလား။ အမေဟာ အဖေ့ကို လုံးလုံး မမှတ်မိတော့ဘူး။ ဖြစ်နိုင်ပါ့မလား။ အိမ်ထောင်သက် အနှစ်ငါးဆယ်ကျော် တလျှောက်လုံး အမေဟာ အဖေ့ကို ဘယ်လောက် မြတ်နိုးခဲ့သလဲ။ ဘယ်လောက် ယုယခဲ့သလဲ။

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

"ညည်းတို့အမေ၊ ညည်းတို့အဖေကို ယုယပုံများတော့ ငါတို့ တသက် တွေ့ဖူးပေါင်အေ၊ အရိပ်ကြည့်နေ တယ်ဆိုတာမျိုးပေါ့။ ညည်းတို့ အဖေဟာလေ ထမင်းတို့ ဟင်းတို့၊ လက်ဖက်ရည်ချိုတို့၊ ကော်ဖီတို့ ဆိုတာတွေဟာ ပန်းကန်ပြား၊ ပန်းကန်လုံးထဲမှာ ဖြစ်တာလို့ သိတော့တာ။ သူ့ရှေ့မှာ စားစရာ သောက်စရာ ချထားရင် မစားတတ်တော့ဘူး။ ညည်းအမေက ကောက်ယူပြီး 'ရော့ ... ကိုမောင်သန်း စားလေ' ဆိုတော့မှ စားတာ။ တခါများ ညည်းတို့အမေက ထမင်းပွဲ ပြင်ပေးခဲ့ပြီး ဧည့်သည်လာလို့ ဧည့်သည်နဲ့ စကားပြောနေတယ်။ တော်တော်လည်း ကြာသွားတယ်။ ဧည့်သည်ပြန်တော့မှ ထမင်းစားပွဲဆီ ၀င်လာတော့..... အမယ်လေးတော် ပြောချင်ဘူး။ မောင်မင်းကြီးသား ထမင်းဝိုင်းမှာ သည်အတိုင်း ငုတ်တုတ်။ ညည်းအမေက 'စား' လို့ မပြောသေးလို့။ အဖြစ်က။

တယောက်နဲ့ တယောက် ချစ်ချစ်ခင်ခင် ကြင်ကြင်နာနာမို့လား မသိပါဘူးအေ စီးပွါးကလဲ ဖြစ်လိုက်တာ။ ညည်းအမေ မထိုက်ကလည်း တော်ပါပေတယ်။ သန်းထိုက် သစ်စက်ဆိုတော့ တနယ်လုံး ဟိုးဟိုးကျော်ပေါ့။

အဲ .... ညည်းအဖေ ဒူးမဖြတ်ရတာလဲ ညည်းအမေကြောင့်ပဲ။ ညည်းမွေးပြီးစလေးပေါ့။ ညည်းအဖေ ဖြစ်တာ။ မြို့ပြင် သံလမ်းတွေဆီသွားပြီး ကန်ထရိုက်သွင်းရဖို့ ဇလီဖားတုံးတွေကို သွားကြည့်တာလေ။ မြို့ဝင်လမ်းမှာ မန်းကျည်းပင်ကြီးတွေကို လှဲပြီး ထင်းလုပ်နေကြသတဲ့။ ညည်းအဖေက ကားလေးနဲ့တဲ့။ မောင်းတဲ့ လူလဲ ရှိပါတယ်။ အဲ့ဒါ လွတ်ပါတယ်ဆိုပြီး ကားဖြတ်မောင်းတာ တခါတည်း မန်းကျည်းပင်ကြီးတပင်က သူ့ကားပေါ် တည့်တည့်ကျတော့တာပဲ။ ကားလေးဟာ တခါတည်း ပြားချပ်သွားတော့တာပဲ။ မောင်းတဲ့လူကတော့ ပွဲချင်းပြီးပေါ့။ ညည်းအဖေက နောက်ခန်းမှာ ထိုင်လာတော့ လူတော့ မသေဘူး။ ကားထဲမှာ ခြေထောက်တွေ ညှပ်နေတာ ဆွဲထုတ်လို့ မရဘူး။ အမလေး ... ညည်းအမေက ဘယ်လောက်သတ္တိကောင်းတယ် မှတ်လဲ။ ဒါလောက်ချစ်တဲ့ ယောက်ျားနော်။ ဦးမောင်သန်းကြီးကား မန်ကျည်းပင် ပိလို့တဲ့ဗျို့ ဆိုပြီးကြားတော့ ငိုလိမ့်မယ် မှတ်လား။ ညည်းကို ရင်ခွင်ထဲက ချပြီး သစ်စက်ကို ပြေးတာပဲ။ သစ်စက်က ရှိသမျှလူခေါ်၊ သစ်လုံးမတဲ့ ဟာကြီးတွေ ယူဆိုပြီး အကုန်စီစဉ်တာ။ ဟိုရောက်တော့ ညည်းအဖေကလေ ပေါ်နေတဲ့ ခေါင်းလေး တယမ်းယမ်းနဲ့တဲ့။

'ဟာ ... မထိုက်၊ ငါပြန်လာပေါ့ကွာ၊ ဘာလို့ လိုက်လာတာလဲ' လို့ ပြောသေးသတဲ့။ တခါတည်း တစချင်း ဆွဲဖယ်ပြီးမှ လူကို ထုတ်ရတာ။ ခြေထောက်နှစ်ဖက်စလုံး အရိုးတွေ ကျိုးကုန်တယ်။ အိုး..... ကုလိုက်ရတဲ့ အမျိုး။ မရွှေထိုက်တို့ကတော့ လူ အားရော၊ ငွေ အားရော၊ ဒါပေမယ့် ဆရာဝန်က မရဘူး။ ဖြတ်ပစ်ရမယ် ဆိုပြီး ပြောရော။ အဲ့ဒါ ညည်းအမေက မဖြတ်ပါရစေနဲ့ဦး။ သူကြိုးစား ကြည့်ပါရစေဦးဆိုပြီး ဆေးဆရာ ရှာတာလေ။ နောက်ဆုံး ညည်းအမေ မေတ္တာကြောင့် ထင်ပါရဲ့။ ရှမ်းဆရာကြီးတယောက်နဲ့ တွေ့ပြီး ဆေးစည်းတာနဲ့ အရိုးတွေ ပြန်ဆက်ပြီး ခြေထောက် မဖြတ်ရတော့ဘူး။ အဲဒီကတည်းက ညည်းအမေ ညည်းအဖေ ခြေထောက်တွေကို အမြဲတမ်း နှိပ်ပေးတဲ့ အကျင့်ဖြစ်သွားတော့တာပဲ။ ညည်းအဖေ ပက်လက်ကုလားထိုင်ပေါ် ထိုင်တာနဲ့ ဘေးကနေပြီး နှိပ်ပေးနေတော့တာပဲ။ သစ်စက်အလုပ်တွေကိုလဲ မလုပ်ခိုင်းတော့ဘူး။"

ကျွန်မတို့ ငယ်ငယ်တုန်းက မေမေ့ညီမ ဒေါ်လေးသိုက် ပြောပြတတ်တဲ့ အဖေနဲ့ အမေအကြောင်းဟာ အိပ်ရာဝင် ပုံပြင်တွေလို နားထောင်လို့ သိတ်ကောင်းခဲ့တာပေါ့။ ကျွန်မတို့ ကြီးတဲ့အထိလဲ သမီးတွေ ကျွေးတာ တောင် မစားပဲ အမေကျွေးမှ စားတာတဲ့။ ခဏလေး အမေ့မမြင်တာနဲ့ 'ညည်းအမေရော' လို့ မေးတတ်တဲ့ အဖေ့ကို ကျွန်မတို့ ရယ်ပွဲဖွဲ့လို့ မဆုံးနိုင်ခဲ့ပါဘူး။

အဖေနဲ့အမေ ညအိပ်ညနေခွဲပြီး ခရီးသွားတာကိုလည်း ကျွန်မသိတတ်စ အရွယ်ကတည်းက တခါမှ မတွေ့ခဲ့ဘူးပါဘူး။ အမေ သစ်စက်သွားတဲ့ အချိန်လောက်ပဲ ခဏ ခွဲနေတာ။ အစ်ကိုကြီး အိမ်ထောင်ကျပြီး သစ်စက်ကို ဦးစီးနိုင်တာနဲ့ အဖေ့နားမှာပဲ အချိန်ပြည့် နေတော့တာပဲ။ ပက်လက်ကုလားထိုင်ပေါ်မှာ အဖေထိုင်ပြီး၊ ကြမ်းပေါ်မှာ အမေက ကျုံ့ကျုံ့ကလေးထိုင်လို့ အဖေ့ခြေထောက်တွေကို နှိပ်ပေးနေတဲ့ မြင်ကွင်းဟာ ကျွန်မတို့ အမြဲတမ်း တွေ့နေကျ မြင်ကွင်းပေါ့။

အမေရယ်။ အိပ်မပျော်နိုင်တဲ့ ကျွန်မ စိပ်ပုတီးတချောက်ချောက် စိပ်ရင်းဘယ်ညာ လူလှိမ့်နေမိတယ်။ အဖေ အိပ်ပျော်ရှာရဲ့လား။ အဖေနဲ့ အမေ တခါမှ ခွဲမအိပ်ဖူးဘူးနော်။ အထီးကျန်ခြင်း ဝေဒနာ ဆိုတာကို အမေမသိပါဘူး အမေရယ်။ သိပ်ဝမ်းနည်းစရာ ကောင်းတာ။ အဖေ့ ချောင်းဆိုးသံက ကျွန်မကို ပိုဝမ်းနည်းလာ စေတယ်။ စိမ့်ကျလာတဲ့ မျက်ရည်တွေကို ကျွန်မ လက်နဲ့ ပွတ်သုတ်လိုက်တော့ စိပ်ပုတီးမှာပါ မျက်ရည်တွေ ရောနှော စွတ်စိုကုန်တယ်။

'နည်းနည်းလောက်တော့ သောက်လိုက်ပါ အဖေရယ်နော်၊ အဖေ ညကလည်း ဘာမှ စားတာ မဟုတ်ဘူး၊ နွားနို့လေး နည်းနည်းလေးနော်... အဖေနော်'

မနက်လင်းတယ် ဆိုကတည်းက ကျွန်မဘယ်လိုပဲ ကြိုးစားတိုက်တိုက် နွားနို့ပန်းကန်ကို အဖေ ခေါင်းယမ်းလို့ချည်း နေတော့တယ်။ ပါးစပ်က မမေးပေမယ့် အဖေ့မျက်လုံးတွေက အခန်းဝကိုချည်း ကြည့်လို့နေတယ်။ အဖေရယ်။

'ပက်လက်ကုလားထိုင်ပေါ် ပြောင်းထိုင်ရအောင်နော် အဖေ၊ ကျွန်မရွှေ့ပေးမယ်၊ ဒါမှ အဖေ အညောင်း မမိမှာ'
အဖေခေါင်းယမ်းနေတဲ့ ကြားထဲကပဲ ကျွန်မအဖေ့ကို ပက်လက်ကုလားထိုင်ပေါ်ကို အသာအယာတွဲပို့ဖို့ ကြိုးစားနေတုန်း
'ဟေ့ .... အဖိုးကြီး မပြန်သေးဘူးလား'
အခန်းဝကနေ ရုတ်တရက် ပေါ်လာတဲ့ အမေ့အသံ ကျယ်ကျယ်ကြောင့် အဖေရော ကျွန်မပါ လန့်ဖျပ်တုန်ယင် သွားခဲ့ပါတယ်။ ပိုးလုံချည် အစိမ်းတွန့်တွန့် ဖြူညစ်ညစ်ပုဝါကို ကျကျနန ခြုံထားတဲ့ အမေက အဖေ့ကို ကြည့်နေတယ်။ အဖေကတော့ အမေ့ကို မကြည့်ပါဘူး။ အဖေ့ကို ပက်လက်ကုလားထိုင်ပေါ် တွဲချ ထိုင်ခိုင်းပြီးတာနဲ့ အခန်းထဲကို ဖျိုးဖျိုးဖျတ်ဖျတ်နဲ့ ၀င်လာတယ်။ ပြီးတော့ အဖေ့ဘေးနား ကြမ်းပေါ်မှာ ထိုင်ချလိုက်တယ်။ ပြီးတော့ အဖေ့ခြေထောက်တွေကို ဖြည်းဖြည်း.... ဖြည်းဖြည်းချင်း။

'အို .... အမေ'
ကျွန်မရဲ့ ၀မ်းသာအားရသံနဲ့ အတူ အဖေ့ မျက်နှာကြည်လင်သွားပုံဟာလည်း မယုံနိုင်လောက်အောင် ပါပဲ။ ဒါပေမယ့် အမေကလေ......

'ဒီ အဘိုးကြီးက တို့အိမ်ဘာလို့ လာနေတာလဲ၊ သူ့မှာ အိမ်မရှိဘူးလား၊ မြန်မြန် ပြန်လွှတ်လိုက်စမ်း၊ ဘယ်ကလဲ ဒီအဖိုးကြီးဟာ...'
အမေရယ် ပါးစပ်က ပြောချင်တာတွေ တွင်တွင်ပြောပြီး အဖေ့ခြေထောက်တွေကို ဖြည်းဖြည်းချင်း တယုတယ နှိပ်ပေးနေတဲ့ အမေ့ကို မကြည့်ချင်တော့ပါဘူး။
အမေအခန်းထဲက ပြန်ထွက်သွားတာနဲ့ ခုတင်ပေါ်က ဇာခြင်ထောင် ထူထူအောက်ကို အဖေပြန်ဝင်သွား ခဲ့တယ်။ ဘာမှလဲ ကျွေးလို့ မရဘူး။

နေ့လယ်လောက်ကျတော့ အဖေ့ကို နွားနို့နဲ့ မုန့်လေးကျွေးဖို့ ကျွန်မနဲ့ မမကြီး ကြိုးစားရပြန်တယ်။ အဖေကတော့ ခေါင်းယမ်းမြဲ။ အပေါ့အပါး သွားပြီးတာနဲ့ ခြင်ထောင်အောက်ကိုပဲ ပြန်ဝင်ဖို့ လုပ်တော့တာပဲ။ ပက်လက်ကုလားထိုင်ပေါ်ကို ရွှေ့လို့ အဖေ ပက်လက်ကုလားထိုင်ပေါ် ရောက်တာနဲ့ အမေရယ်လေ ဗြုန်းဆို ပေါက်ချလာပြီး.......
'ဒီအဖိုးကြီး မပြန်သေးဘူးလား၊ ဘယ်ကလဲ ဒီအဖိုးကြီးနဲ့' ပါးစပ်က ဘာတွေ ပြောပြော အမေက အဖေ့ ပက်လက်ကုလားထိုင်ဘေးမှာ ထိုင်ပြီး ယုယုယယ နှိပ်နေပါပြီ။ အမေရယ်။ မမကြီးက မျက်ရည်ကျ နေတယ်။

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ညနေကျတော့လည်း ခြင်ထောင်ထဲက မထွက်တော့တဲ့ အဖေ့ကို ကျွန်မ ဇွတ် ချော့မော့ပြီး အပြင်ကို ခေါ်ထုတ်ရပြန်တယ်။ ကျွန်မ မျက်ရည်တ၀ဲဝဲနဲ့ တိုက်တဲ့ နွားနို့ပန်းကန်ကို သည်တခါတော့ အဖေက ကြည့်တယ်။ ပြီးတော့ ကျွန်မကို သေချာ စိုက်ကြည့်နေပြီး ပက်လက်ကုလားထိုင်ပေါ် ပို့ဖို့ ပြတယ်။
ကုလားထိုင်ပေါ်ရောက်ပြီးမှ အဖေ ပြန်ထတယ်။ အိပ်ရာပေါ်ကို ဇွတ်လက်ညှိုးထိုးပြနေတယ်။ 'ပို့ ပို့' တဲ့။

'အဖေကလဲ နွားနို့လေး သောက်ပြီးမှ ပြန်အိပ်ပါ။ ဒီမှာ ခဏလေး နေလိုက်ပါဦး'
အဖေခေါင်းကို ယမ်းပြီး ကျွန်မကို သနားစရာ ကြေကွဲစရာ အကြည့်နဲ့ မော့ကြည့်တယ်။ ပြီးတော့မှ တိုးတိုးလေး 'ညည်းအမေ မြင်ရင် အဖေ့ကို နှင်လိမ့်မယ်' တဲ့။ အို.... အဖေရယ်။

ကျွန်မ ရုတ်တရက် ဘာမှ ပြန်မပြောနိုင်အောင် စိတ်ထိခိုက်ရတယ်။ အေးစက်စက် အဖေ့လက်တွေကို ကျွန်မ ကြင်ကြင်နာနာ ကိုင်ထားလိုက်တုန်းမှာပဲ အမေရယ်လေ....

'မိသိုက်ကအေ သိပ်ညစ်တာပဲ၊ တော်ပြီ ဒီကောင်မနဲ့ နောက်မကစားဘူး'
ဒေါ်လေးသိုက်တို့ အိမ်က အပြန် အကြီးအကျယ် အော်ဟစ်သောင်းကျန်းလာတဲ့ အမေက အဖေ့အခန်းဝကိုတော့ တန်းတန်းမတ်မတ်လာတယ်။ ပက်လက်ကုလားထိုင်ဆီကိုလဲ တန်းတန်းမတ်မတ်။ ပြီးတော့ အဖေ့ခြေထောက်တွေကိုလည်း တယုတယ။ ဒါပေမယ့် အဖေ့ကို စူးစူးကြည့်လို့.....

'ဟဲ့ အဘိုးကြီး သူများအိမ်ကို အားမနာဘူးလား၊ မရှက်ဘူးလား၊ ပြန်ပါတော့လား၊ ကိုယ့်အိမ်ကို မပြန်ရင်လေ မပြန်ရင်'

အမေက နှိပ်နေတာကို ရပ်ပြီး ခဏ စဉ်းစားတယ်။ ပြီးတော့မှ အားရပါးရ ဆက်နှိပ်ရင်း 'ရိုက်ထုတ်မယ်၊ ရိုက်ထုတ်မယ်ဟေ့' တဲ့။

'အမေကလဲနော်'
မမကြီးနဲ့ ကျွန်မက စိတ်ထိခိုက် ညစ်ညူးပေမယ့် အဖေဟာ ဒီတခါတော့ ထူးထူးဆန်းဆန်း မျက်နှာ မလွှဲပဲ အမေ့ကို စိုက်ကြည့်နေခဲ့တယ်။ ဒါပေမယ့် အဖေ့ မျက်နှာကတော့ ကြေကွဲစရာ အကောင်းဆုံး၊ ၀မ်းနည်းစရာ အကောင်းဆုံး မျက်နှာ။
အဲ့သည်ညမှာပဲ အဖေ ဆုံးသွားရှာပါတယ်။

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

ပြတင်းပေါက်က ၀င်တဲ့ လေအရှိန်နဲ့ တဖျပ်ဖျပ်လွင့်နေတဲ့ ဇာခြင်ထောင်ကို ကျွန်မနဲ့ မမကြီး မွေ့ရာအောက်မှာ သပ်သပ်ရပ်ရပ် ဖိလိုက်ကြတယ်။ ပက်လက်ကုလားထိုင်ကိုလည်း နေသားတကျ။ ခုတင်ဘေးက စားပွဲလေးပေါ်မှာလည်း နွားနို့ဓါတ်ဗူးနဲ့ ပန်းကန်ပြားလေးကို အဖေရှိနေတုန်းကလိုပဲ သေသေသပ်သပ် ချထားပါတယ်။ အခန်းဝက ကြည့်လိုက်ရင် ခြင်ထောင်ထဲမှာ အဖေရှိနေသလို ပေါ့နော်။ မမကြီးဆီက ကြိတ်ပြီး ရှိုက်သံ ကြားရတယ်။

'ငါ့ကို ဘာဖြစ်လို့ မိသိုက်တို့အိမ် ညအိပ်ခိုင်းရတာလဲ၊ ပြောစမ်းပါဟဲ့'
ဟော အမေပြန်လာပြီ။ အမေပြန်လာရှာပြီ။ မမကြီးက မျက်ရည်တွေကို ကဗျာကယာ သုတ်တယ်။ အမေ့ကို ခေါ်လာတဲ့ အစ်ကိုကြီးရဲ့ 'အမေကလဲဗျာ' ဆိုတဲ့ စိတ်မကောင်းသံကို ကြားရတယ်။

'သူများအိမ်မှာ အပျိုအရွယ်လေး ည သွားအိပ်လို့ မကောင်းဘူးဆိုတာ နင်တို့ မသိဘူးလား။ ငါတစက်မှ အိပ်မပျော်ဘူး။ ဒီနေ့ညသာ ဆက်အိပ်ရရင် မိသိုက်တို့အိမ် မီးနဲ့ အရှို့ပဲ'
ကျွန်မနဲ့ မမကြီး အခန်းထဲက မြန်မြန်ထွက်လိုက်ကြတယ်။ ဧည့်ခန်းထဲမှာ အမေက ဆွဲထားတဲ့ အစ်ကိုကြီးလက်တွေကို ရုန်းဖယ်လို့။

'ဒီမှာ ထိုင်ရအောင်လေ အမေ'
အမေက ခေါင်းကို သွက်သွက်ခါ ယမ်းရင်း ကျွန်မနဲ့ မမကြီးကို လှမ်းကြည့်တယ်။ ပြီးတော့ ကျွန်မတို့ နှစ်ယောက်ကြားက ဖြတ်ပြီး အိပ်ခန်းဆီကို တန်းတန်းမတ်မတ်။

'အမေ'
ကျွန်မ လွှတ်ခနဲ ခေါ်လိုက်ရင်း အမေ့နောက် မြန်မြန် လိုက်ခဲ့တယ်။ အမေက အခန်းဝမှာ ရပ်ပြီး ခုတင်ကို ငေးကြည့်နေတယ်။ ပြီးတော့ အခန်းထဲ ဖြည်းဖြည်းချင်း ၀င်သွားတဲ့ အမေ့ကို နောက်ကနေ ကျွန်မတို့ မောင်နှမသုံးယောက် အသက်မရှူဘဲ ကြည့်နေမိကြတယ်။ အမေက ခုတင်ကို တပတ်ပတ်လိုက်တယ်။ ပြီးတော့ ပက်လက်ကုလားထိုင်လေးကို လက်နဲ့ ထိကြည့်တယ်။ ပြီးတော့ အခန်းထဲကို လှည့်ပတ်ကြည့်ရင်း ဘုရားစင် စားပွဲခုံပေါ် ထောင်ထားတဲ့ အဖေ့ဓါတ်ပုံကို မြင်တော့ ဟက်ဟက်ပက်ပက် ရယ်ချလိုက်တယ်။

'အမေကလည်းဗျာ'
အစ်ကိုကြီးက သက်ပြင်းတချက်ကို ချလို့ ခုတင်ဘေးက ပက်လက်ကုလားထိုင်ပေါ်မှာ ခြေပစ်လက်ပစ် ထိုင်ချလိုက်တယ်။
အဖေ့ဓါတ်ပုံကို ကြည့်နေတဲ့ အမေဟာ သည်ဘက်လှည့်လိုက်တာနဲ့ ပက်လက်ကုလားထိုင်ပေါ်က အစ်ကိုကြီးကိုလည်း မြင်ရော အံ့သြသလို မျက်နှာပြောင်းလဲသွားရင်း ပက်လက်ကုလားထိုင်ဘေးကို ချက်ချင်း ရောက်လာတော့တယ်။ ပြီးတော့ ကျုံ့ကျုံ့ကလေးနဲ့ အစ်ကိုကြီး ခြေထောက်တွေကို ဖြည်းဖြည်းချင်း တယုတယ နှိပ်တော့တာပါပဲ။

'အမေ'
အစ်ကိုကြီးက သူ့မျက်နှာကို လက်ဝါးနဲ့ အုပ်လိုက်တယ်။ အမေကတော့ အားရပါးရ နှိပ်နေရင်းကနေ အစ်ကိုကြီးဆီက တအစ်အစ်နဲ့ ရှိုက်သံထွက်လာတော့ ဖြည်းဖြည်းချင်း အစ်ကိုကြီးကို မော့ကြည့်တယ်။ ပြီးတော့ ဘာမှ မဖြစ်သလို ဆက်နှိပ်ပြန်တယ်။ ဒါပေမယ့် တဖြည်းဖြည်း လှုပ်ရှားနေတဲ့ အမေ့လက်ချောင်း ပိန်ပိန်လေးတွေ နှေးကွေးသွားပြီး ခဏနေတော့ ဆတ်ခနဲ ထပြီး အခန်းထဲက ထွက်သွားတော့တယ်။

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx

'ခင်ထွေး .... သမီး'
အဖေ့အိပ်ရာဆီကို လှမ်းလိုက်တဲ့ ကျွန်မတကိုယ်လုံး တုန်လှုပ်သွားခဲ့တယ်။ အမေ။ နံနက်လင်းစ မှောင်ရီရီ အလင်းရောင်အောက်မှာ အမေရယ်လေ။ ခြင်ထောင်ဘေးမှာ ရပ်လို့။ အမေမနိုးခင် အဖေ့အိပ်ရာကို နေသားတကျ ဖြစ်အောင်လို့ ကျွန်မ အစောကြီး ထလာခဲ့တာ။

'အမေ'
ခုတင်ဘေးမှာ တည်ငြိမ်ခံ့ညားစွာ စိုးရိမ်ပူပန်ကြီးတတ်တဲ့ အမူအရာနဲ့ ရပ်နေတဲ့ အမေဟာ ကျွန်မတို့ရဲ့ အလျင်က အမေ ပေပဲလား။
'သမီး'
ကျွန်မ နားကြားမလွဲပါဘူးနော်။ အမေ့နားကို တိုးကပ်ရင်း အမေ့လက်တွေကို ၀မ်းသာအားရ ကျွန်မ ဆွဲယူမိလိုက်တယ်။

'အို အမေ့လက်တွေ အေးစက်နေတာပဲ'
'ဖယ်စမ်းပါ'
အမေက သူ့လက်တွေကို ပြန်ဆွဲယူရင်း အလျင်စလို နိုင်လှတဲ့ ဟိုတုန်းက အမေ့လေသံနဲ့...
'ညည်းအဖေရော'
'ဟင်'
'ညည်းအဖေ ဘယ်မှာလဲ၊ ညည်းအဖေ ဘယ်ရောက်သွားလဲ'
ဘုရား ဘုရား၊ ကျွန်မ ဘာပြောရမလဲ။ အမေလေ ကျွန်မလက်တွေကို ဆွဲခါလှုပ်ရမ်းနေတယ်။
'ပြောလေ၊ ညည်းအဖေရော လို့ဆို'
'အဖေ ရှိပါတယ်'
'ဘယ်မှာလဲ'
'ရှိပါတယ်'
'အို မရှိပါဘူး၊ ငါ အရုဏ်တက်ကတည်းက ညည်းတို့ မနိုးခင်ကတည်းက လိုက်ရှာနေတာ၊ တအိမ်လုံးနှံ့နေပြီ'
'ပြောစမ်းပါအေ ဘယ်မှာလဲ'
'...........'
'ညည်းတို့ ဘယ်ကို ပို့ထားကြသလဲ ဟင်'
'မပို့ပါဘူး အမေရယ်'
'အို အေ'

မျက်ရည်တွေ လိမ့်ဆင်းကျလာတဲ့ ကျွန်မကို အမေက စိတ်မရှည်သလို တွန်းလိုက်ပြီး အမေ့ခန္ဓာကိုယ် လေးဟာ ခုတင်ပေါ်ကို အ၀တ်ပျော့လေးတခုလို ပုံကျသွားခဲ့တယ်။ အမေတင်ထားတဲ့ ဇာခြင်ထောင်အောက်က အိပ်ရာရဲ့ ဘယ်ဘက်ခြမ်းပေါ်မှာ ခွေခွေလေး။ အမေ့မျက်နှာက အဆမတန် အိုမင်းနွမ်းနယ်နေပြီး အမေ့ မျက်လုံးမှာ ဒေါသနဲ့ စိုးရိမ်သောကတွေ။ အမေ့ဆီမှာ ပူးကပ်နေတဲ့ လန်းဆန်းတက်ကြွမှုတမျိုး ဘယ်ရောက် သွားပြီလဲ။
အမေက ခြင်ထောင်အမိုးကို အကြာကြီး စိုက်ကြည့်နေရာကနေ ကျွန်မဘက်ကို ဆတ်ခနဲ လှည့်ကြည့် လိုက်တယ်။

'အသက်ရှင်ရက်တော့ ငါတို့ကို ခွဲမထားကြပါနဲ့အေ'
အမေ့ရဲ့ တောင်းပန်ညည်းညူသံဟာ ကျွန်မကို နာကျင်စေပါတယ်။
'ရှင်ကွဲ, ကွဲရတဲ့ဒုက္ခကို ညည်းတို့ မသိပါဘူး'

အို ...... အမေရယ်။ ကျွန်မ မသိဘဲ ရှိပါ့မလား။ ကျွန်မခံစားနေရတာပဲ အမေ။ အမေ့လို ကျွန်မ ပေါက်ကွဲ ပါရစေတော့။ အမေ နားထောင်ပါနော်။
တဖက်စောင်းသွားတဲ့ အမေ့ရဲ့ လက်တွေကို ကျွန်မ ဆွဲယူလိုက်တဲ့အခါ အမေ အသက်မရှိတော့ပါဘူး။


နုနုရည် အင်းဝ။

(ဒီနေ့ ကျွန်တော့်အဖွားဆုံးတာ ၁၁နှစ်ပြည့်ခဲ့ပြီ။ သတိရတယ်ဆိုတာထက် အစားထိုးမရတဲ့ ဆုံးရှုံးမှုတစ်ခုပါပဲ။ ခု ရှင်ကွဲ ၀တ္တုလေးကိုလည်း ဘ၀မှာ သေကွဲ မခွဲခင် ရှင်ကွဲ ကွဲနေကြသူအားလုံးအတွက် ပြန်လည်မျှဝေလိုက်ပါတယ်။ ဒီဝတ္ထုလေးကို ဖတ်ရင်း၊ The Notebook ဇာတ်လမ်းကိုလည်း သတိရမိတယ်။ အချိန်ရရင် ကြည့်စေချင်ပါတယ်။ Nicholas Spark ရဲ့ The Notebook ပါ..။ မေတ္တတရားနဲ့ ယှဉ်တဲ့ အချစ်စစ် အချစ်မှန် ချစ်ခဲ့ကြသူတွေရဲ့ သံယောဇဉ်နဲ့ဖွဲ့တည်ထားတဲ့ ဇာတ်လမ်းလေးပေါ့။ ချစ်သူ ဆိုတာ တကယ်တော့ အဲ့လိုချစ်တတ်မှပဲ ချစ်သူလို့ ကျွန်တော် ယုံလိုက်ပါပြီ။ အားလုံးလည်း ချစ်သူကို တန်ဖိုးထားပြီး ရိုးမြေကျတဲ့အထိ ပေါင်းနိုင်ကြပါစေ.. တစ်ယောက်ကိုတစ်ယောက် ကြင်ကြင်နာနာနေပြီး မေတ္တာထားချစ်ကြတဲ့ အဖွားနဲ့ ဘဘလည်း ကောင်းရာမွန်ရာရောက်မယ်လို့ ယုံကြည်ပါတယ်။ အဖေနဲ့ အမေက ဒီနေ့ ဘုန်းကြီးကျောင်းကို ဆွမ်းချိုင့်ပို့ကြတယ်လေ။) ဒီပုံလေးက လွန်ခဲ့တဲ့ နှစ်ပေါင်း ၂၀လောက်က ကျွန်တော်နဲ့ ဘဘ၊ အဖွား (မေမေစိန်) နဲ့ ပုဂံ-ညောင်ဦးကို ဘုရားဖူးသွားတုန်းက ရိုက်ထားတာလေး။ ကျွန်တော်သွားလေရာယူတတ်တဲ့ ပုံတွေထဲက တစ်ပုံပေါ့နော်။ ဓာတ်ပုံရိုက်ခါနီးတော့ အဖွားက ဘဘကို ဆရာလုပ်တယ် ပဲ, လုပ်ဖို့။ သူကိုယ်တိုင်လည်း ပန်ထားတဲ့စံပယ်ပန်းက မပေါ်မှာစိုးလို့တဲ့ အနောက်က စက္ကူပန်းပင်ကနေ ပန်းလေးကို ချိုးပန်လိုက်သေးတယ်။ အဲ့လိုအလှကြိုက်တာ။ လွမ်းတာထက် တမ်းတမိတယ်။ တကယ် တကယ်..။